ناوه‌ڕۆكی‌ كۆبوونه‌وه‌كه‌ی‌ سه‌رۆكی‌ هه‌رێم له‌گه‌ڵ وه‌زیری‌ پێشمه‌رگه‌ و پارێزگاری كه‌ركوك

خه‌ندان- لاوكو عه‌لی 

ئه‌مڕۆ مه‌سعود بارزانی‌ سه‌رۆكی‌ هه‌رێمی كوردستان و كۆسره‌ت ره‌سول عه‌لی جێگری سه‌رۆكی‌ هه‌رێم، له‌گه‌ڵ شێخ جه‌عفه‌ر شێخ مسته‌فا وه‌زیری پێشمه‌رگه‌ و لیوا جه‌بار یاوه‌ر ئه‌مینداری گشتی‌ وه‌زاره‌تی‌ پێشمه‌رگه‌ و پارێزگاری كه‌ركوكدا كۆبوونه‌وه‌.

ته‌وه‌ری سه‌ره‌كی‌ كۆبوونه‌وه‌كه‌ تایبه‌ت بووه‌ به‌ تاووتوێكردنی‌ بارودۆخی شاری كه‌ركوك و ناوچه‌ دابڕێنراوه‌كان، به‌تایبه‌تی‌ دامه‌زراندنی‌ فه‌رمانده‌یی ئۆپراسیۆنی‌ دیجله‌، كه‌ به‌فه‌رمانی‌ نوری مالیكی‌ سه‌رۆك وه‌زیرانی‌ عیراق ده‌رچووه‌.

له‌مباره‌یه‌وه‌ جه‌بار یاوه‌ر ئه‌مینداری وه‌زاره‌تی‌ پێشمه‌رگه‌، له‌لێدوانێكیدا بۆ سایتی‌ خه‌ندان وتی‌: "له‌كۆبوونه‌وه‌كه‌دا جه‌خت له‌وه‌ كرایه‌وه‌ كه‌ هه‌رێمی‌ كوردستان به‌هه‌موو شێوه‌یه‌ك پێكهێنانی‌ فه‌رمانده‌یی ئۆپراسیۆنی‌ دیجله‌ ره‌تده‌كاته‌وه‌، چونكه‌ نابێته‌ هۆكارێك بۆ سه‌قامگیری، به‌ڵكو باری ئه‌منی‌ كه‌ركوك و ناوچه‌ دابڕێنراوه‌كان ئاڵۆز تر ده‌كات".

وتیشی: "به‌پێی ئه‌و فه‌رمانه‌ ئیدارییه‌ی‌ له‌لایه‌ن فه‌رمانده‌ی‌ گشتی‌ هێزه‌ چه‌كداره‌كانی‌ عیراقه‌وه‌ ده‌ركراوه‌، ده‌بێت هه‌موو هێزه‌كانی‌ پۆلیس و ئاسایش و سوپا له‌دیاله‌ و كه‌ركوك بچنه‌ ژێر ده‌سه‌ڵاتی‌ فه‌رمانده‌یی ئۆپراسیۆنی‌ دیجله‌وه‌ كه‌ ئه‌مه‌ش چوونیه‌ك نییه‌ له‌گه‌ڵ رێكه‌وتنه‌كانی‌ پێشووتر له‌نێوان هه‌رێم و به‌غدا له‌باره‌ی‌ ئه‌و ناوچانه‌وه‌ كه‌ ده‌بێت پاراستنیان و هه‌ر چالاكییه‌كی‌ سه‌ربازی‌ به‌هاوبه‌شی و هه‌ماهه‌نگی‌ له‌نێوان هێزی‌ پێشمه‌رگه‌ و سوپای‌ عیراق به‌ڕێوه‌بچێت، یاوه‌ر وتی‌:"له‌كاتێكدا یه‌كێك له‌ بنه‌ما سه‌ره‌كییه‌كان ئه‌وه‌یه‌ پۆلیس ئه‌منییه‌تی‌ شاره‌كان بپارێزێت نه‌ك سوپا".

روونیشیكرده‌وه‌، له‌رووی یاسایی و ده‌ستووری و ئیداری و جه‌ماوه‌رییه‌وه‌، هه‌وڵ ده‌ده‌ین بۆ ره‌تكردنه‌وه‌ی‌ ئه‌و فه‌رمانده‌ییه‌ و نه‌هاتنیان بۆ ئه‌و ناوچانه‌.

Source : Xendan